اختار صحبك كويس

بسم الله الرحمن الرحيم

السلام عليكم ورحمة الله وبركاته

موضوعنا النهاردة بيأثر في تكوين شخصيتنا , بيأثر في اخلاقنا , بيأثر في قرارتنا ,.....

موضوعنا النهاردة

(( أختار صاحبك ))

اول حاجة عايز افرق بين حاجتين واعتقد اننا عارفين الفرق بينهم ,

عايز افرق بين ((الصاحب)) و ((الزميل)) .

الزميل كلمة اعم واشمل من الصاحب , هو اي واحد معاك في الفصل , اي بنت معاكي في الدرس , اي ولد معاك في الدفعة .

انما الصاحب هو الشخص اللي انت بتحب تحكي معاه , هيا البنت اللي بتديها سرك , هو الولد اللي انت بتحب تخرج وتتمشى معاه .....

ملحوظة : الصاحب كلمة تساوي الصديق

موضوعنا النهاردة عن ((الصاحب)) , ازاي اختاره ؟ , هو في شروط اختار صحبي عليها ؟ , هو ممكن تقتنعي بكلام صحبتك رغم انه مخالف لرأي بابا وماما ؟ , صحبي ممكن يغيرني ؟ , هو انا ممكن اعيش من غير صحاب ؟, ... اسئلة كتير ليها علاقة بموضوعنا ان شاء الله هنحاول نبين اكبر قدر منها .

طب ايه المشكلة لو انا معنديش صحاب , او انا مش عايز يكون ليا اصحاب في مشاكل كتير :

* قرارتك كتير منها غلط .
* اجتماعيا انت انسان مش اجتماعي .
* مغرور (( شايف ان محدش يستحق ان يكون صحبك )) .
* الشيطان معاك (( فإن الشيطان مع الواحد وهو من الاثنين أبعد)).
.......

طب ايه هيا الشروط او المواصفات في اختيار الصديق :

* صالح وده اهم شرط .
* اخلاقه كويسة .
* امــين .
* وفــي .
* يعينك على طاعة ربنا .
* قريب منك في السن .

ياريت الشروط دي نبص فيها , ونشوف نفسنا فيها , انا امين بنسبة كام , انا اخلاقي ازاي ؟ بشتم كتير , بغتاب صحابي , بكسل اصلي , لبسي محترم , بحفظ السر , عندي حقد ......

في الوقت الحالي الفساد منتشر , الاخلاق السيئة كتير ,الكدابين كتير , الامانة راحت , اصدقاء السوء كتروا جدااااا .....

طب ايه الضرر من اني يكون صحبي وصديقي سئ اومفيهوش من الصفات اللي فوق دي :

يقول تعالى " الاخلاء يومئذ بعضهم لبعض عدو الا المتقين "

الخليل هو الصاحب وده إذا كان يوم القيامة انقطعت الأرحام و قلت الأنساب و ذهبت الأخوة إلا الأخوة في الله .

يوم القيامة ندم شديد جدااا على ان صحبك سئ مش ملتزم يقول تعالى : " ويوم يعض الظالم على يديه يقول يا ليتني اتخذت مع الرسول سبيلا * يا ويلتى ليتني لم اتخذ فلانا خليلا * لقد اضلني عن الذكر بعد اذ جاءني وكان الشيطان للانسان خذولا "

هتندمي انك سبتي صحبتك المحجبة المؤدبة وصاحبتي المتبرجة , او اللي متحجبة اسما لا فعلا .

هتندم انك سبت صحبك اللي ببحافظ علي الصلاة , اللي مش بيشتم , وروحت صاحبت الشباب الفاسد السلبي .

والفرق بين الصديقين الصالح والسوء واضح جدا في الحديث الشريف : إنما مثل الجليس الصالح وجليس السوء كحامل المسك ونافخ الكير، فحامل المسك إما أن يحذيك وإما ان تبتاع منه وإما أن تجد منه ريحاً طيبة ونافخ الكير إما أن يحرق ثيابك وإما أن تجد منه ريحاً منتنة "

هنروح لموضوع تاني بس ليه علاقة بالصداقة , اني في واحد بيصاحبني عشان مصلحة , واحد بيصاحبني عشان يضيع وقت ....

والحقيقة ان النوع ده كتير وموجود للاسف بينا , نلاقي واحد لازق فيا ليل نهار عشان اشرحله وفي المذاكرة ميعرفنيش , هنلاقي واحدة مصحباكي عشان تساعديها في اي مصلحة ليها .

النوع ده الواحد صراحة ميزعلش عليه , لان انا كسبت اكتر ما خسرت , يعني احمد ربنا انه مش صحبك , بياخد حاجته ويمشي بس , لان ده لو اعتبرته صاحبك هتبقي مشكله كبيرة .

وفعلا ارسطو كان مقسم الصداقة 3 انواع :

1- صداقة المنفعة ( هي صداقة عرضية تنقطع بأنقطاع الفائدة).
2- صداقةاللذة( فنتعقد وتنحل بسهولة بعد إشباع اللذة أو تغير طبيعتها ).
3- صداقة الفضيلة (فهي أفضل صداقة وتقوم على أساس تشابه الفضيلة وهي الأكثر بقاء ) .

ياريت نبدأ ندور على صداقة الفضيلة , على الصاحب الكويس اللي هينفعني في دنيتي واخرتي , اصحاب السوء ابعد عنهم مش هقولك سيبهم خالص , بس خليهم في منزلة الزميل مش الصاحب .

واحب اختم بجملة كنت سمعتها من ا / عمرو خالد :

....عايز تعرف اخلاق واحد شوف صحبه مين ....

يارب يكون موضوعي نال اعجابكم وتقدريكم

تحياتي لكم

" أحبكم في الله "

سلمت اناملك نور
موضوع والله كتير مهم ومفيد
فالصديق مرآة لصديقه
صدقتى فى كل كلمة قولتيها
دومتى بكل خير
تحيــاتى